Ég hef ákveðið að breyta nafninu mínu í Ómar Sykurvin, í stað hins gamla Ómar Sigurvin. Mér finnst það lýsa mér betur. Spurning hvað mannanafnanefnd gerir í þessu máli??

Jæja, ég ætlaði að breyta síðunni og fá mér BlogPot síðu en því miður er einhver búinn að taka síðuna mína. Kíkið á http://omarsigurvin.blogpot.com, þar eru einhverjir sem eru alveg sammála mér og mínum boðskap....

p.s. Allir að finna eitthvað skemmtilegt að gera með mér eftir 5. mars, þar sem þá er ég búinn í prófunum í bili og rannsóknarverkefnið tekur við. Ég verð laus flest kvöld og allar helgar :)

Ég á átta yfirstrikunarpenna, 50% þeirra eru gulir, 25% bleikir; 12,5% grænir og 12,5% appelsínugulir. Af því dreg ég þá ályktun að ég hafi mest dálæti á gulum lit.

Af hverju þarf maður að taka ákvarðanir í lífinu? Það er svo leiðinlegt...

Ég er í happanærbuxunum mínum, þetta próf getur ekki klikkað!

Nú getur fólk kosið með því að smella á myndina efst á síðunni, þarf bara að lesa reglurnar og svo offf you go :)
Kosningu lýkur 04:04:04 þann 4. mars (þá verð ég örugglega vakandi að læra fyrir meinafræði). Munið, þið megið velja mynd í 1., 2. og 3. sæti en hver má bara velja eina þrennu.
Verðlaunin eru 3réttuð máltíð sem ég elda auk skemmtilegrar kvöldstundar í samráði við sigurvegarann!

Megi besta/versta myndin vinna! Jibbý kóla!

p.s. Hægt er að smella í info við hverja mynd til að sjá stutta lýsingu á myndinni. Athygli er vakin á því að myndin af Ingu Láru var send inn undir dulnefninu Kindin Einar og er þetta eina myndin sem send var undir dulnefni.

Fresturinn til að skila inn myndum fyrir Grettuna 2007 rennur út klukkan 22:22:22 í kvöld. Myndirnar koma síðan inn hérna klukkan 00:00:00 í kvöld (þegar 14. feb byrjar). Nú þegar eru komnar á annan tug mynda og þetta verður skemmtilegt. Í kjölfarið fær fólk svo góðan frest til að kjósa en kosningin verður leynileg og úrslitin kunngjörð klukkan 18:18:18 þann 5. mars n.k.

Í kjölfarið á umræðum Kastljóss undanfarið hef ég ákveðið að bjóða upp á alhliða pakka, sem að læknar alla, þá sérstaklega homma og krabbameinssjúklinga. Pakkinn kostar einungis 5.000.000 kr og felst í því að fyrst verður boðið upp á afeitrunarfótabað til að losna við sorann úr fólki. Síðan verð ég, í samstarfi við fleiri góða aðilja, eins og fíflið í Kastljósi í gær og Gunnar í Krossinum, með afhommun fyrir þá sem þurfa (til að fólk fari ekki til helvítis) og að lokum munum við fá góðan gest (Jónínu Ben) í heimsókn til að ristilskola alla og taka í stólpípu.

Er vitleysunni sem boðið er upp á í "fréttaskýringarþættinum" Kastljósi (og fleiri þáttum) engin takmörk sett? Svo eru þau ekki einu sinni með gagnrýna spyrla, heldur bara ungt fólk sem lætur þá sem eru að bjóða upp á bull eins og afhommun komast upp með að blaðra og blaðra út um rassgatið á sér. Rugl!

Mannanöfn

Já, ég var að enda við að kíkja á vef Mannanafnaskrár á Íslandi. Það er áhugaverð lesning og hef ég verið að velta fyrir mér hvort ekki eigi að senda fólkið í Mannanafnanefnd í lyfjapróf fyrir fundi, það hlýtur að vera allt fullt af ofskynjunarlyfjum í þeirra hópi.

Dæmi um nöfn sem hafa verið bönnuð eru: Arnarr, Ólaf, Niels og millinafnið Eðvald (sbr. Jón Eðvald, stórmeistari og Pezkall) hjá strákum. Hjá stelpunum eru t.d. nöfnin Annalísa, Gígja og Kæja (auk kvenmannsnafnsins Örn sem ég skil ekki alveg).
Sum þessara nafna eru kannski ekki alveg fallegustu nöfn í heimi (mér finnst þó Arnarr og Eðvald t.d. mjög fín) en þau eru þó MUN skárri en nöfnin sem eru leyfð.

Dæmi um karlmannsnöfn sem má skíra eru: Austri, Ásröður, Bambi, Bjólan, Díómedes, Dónaldur, Dufþakur, Ebenezer, Fífill, FRITZ, Gizur, Gígjar og Gýgjar, Haddur, Hlégestur, Jack, Kjallakur, Kópur, Leiðólfur, Lýtingur (talandi um að vera vondur), Ljótur, Muggur, Marijón, Neptúnus, Nóvember, Príor, Röðull, Saxi, SKÚTA, Trúmann, Úranus, Vopni, Ýrar og Þiðrandi.

Síðan má skíra stelpur m.a.: Alfífa, Bengta, Bil, Brák, Dimmblá, Drótt, Enóla, Fema, Grét, Gæflaug, Kapitola, Októvía, Petrónella, Sigurbirna, Sylgja, Tala, Tóka, Úa, Véný, Þoka, Ægileif og Örbrún.

Millinöfnin eru mun skemmtilegri: Espólín, Falk, Gnurr, Har, Íshólm, Ljós, Loðmfjörð, Ósmann, Reynholt, Önfjörð og Örbekk eru þar á meðal.

Mig langar mikið að skíra verðandi son minn Fritz Gnurr Ljós Ómarsson (það má hafa tvö milliöfn, sko) og dóttur mína Alfífa Espólín Ómarsdóttir.

Er fólkið ekki að grínast??? Ég er allavegana sáttur við að heita "bara" Ómar Sigurvin.

p.s. Bara sex dagar í Grettuna 2007 (sbr. nýjan og stórskemmtilegan haus á síðunni) :)

Um áramótin ákvað ég að reyna að gera eitthvað í mínum málum, þar sem ég hef aldrei verið þyngri (líkamlega) en þá. Einnig þurfti ég að reyna að ná upp fyrri kröftum í veika fætinum en það hefur gengið svona upp og niður síðasta hálfa árið.
Ég fór og keypti mér árskort í World Class, allt gott og blessað og byrjaði að fara 3-4 sinnum í viku, oftast í Laugar. Þetta er frábær stöð og alveg ótrúlega gott að æfa þarna, þó að þetta sé kannski í það stærsta. Það sem mér fannst fyndnast við að byrja að æfa aftur í líkamsræktarstöð var að fylgjast með fólkinu og þeim leiða ávana sem sumt fólk hefur. Ávaninn felst í því að vera ALLTAF að horfa á sjálfan sig í spegli, bæði við æfingar og þegar ekki er verið að gera æfingar. Auðvitað er það skiljanlegt að sumir vilji sjá sig við æfingar, þar sem að það getur hjálpað manni að gera þær rétt. Það sem ég skil hins vegar ekki er þegar fólk horfir endalaust oft í spegil þegar það er í hvíld. Er það ekki bara narcissismi (sjálfsdýrkun)?
Til dæmis var (þangað til fyrir helgi, veit ekki hvort það kemur aftur) spegill í hverjum einasta skáp í Laugum (allavegana í karlaklefanum :) ) og kom það mjög oft fyrir að sama manneskjan leit í spegilinn þegar skápurinn var opnaður, aftur þegar að hann var kominn úr fötunum og einu sinni enn þegar að hann var kominn í æfingarföt. Svo þegar upp í salinn var komið, þá var tekið létt session sem fól meðal annars í sér að horfa í spegilinn svona 30 sinnum. Eftir æfingar fór viðkomandi niður í klefa, speglaði sig í/úr fötum og fyrir/eftir sturtu og loks þegar að í fötin var komið. Ég giska á að sami tími hafi farið í upphitun/brennslu og að spegla sig.
Svo er líka fyndið að fylgjast með körlum sem æfa í stöðinni, sérstaklega þegar sætar stelpur labba framhjá. Þá skyndilega fara þeir að lyfta áður óþekktum þyngdum (samt bara einu sinni eða tvisvar í mesta lagi). Stelpurnar í ræktinni eru spes kafli útaf fyrir sig, sérstaklega þær sem að mála sig ÁÐUR en þær fara á hlaupabrettið og setja á sig ALLA skartgripi sem að þær koma fyrir á sig. Það er samt spurning hvort að það sé ekki ágætis líkamsrækt, ég meina þetta virkar bara eins og að vera með 2 kílóa handlóð;)

Talandi um útlitsdýrkun þá hefur fólkið sem vill senda mér ljótar grettumyndir af sér 9 daga til þess (með deginum í dag). Og sama hversu ljót grettan verður, þá get ég lofað ykkur að þið eruð mun fallegri en spegladýrkandi ljósabekkjafólkið í Laugum!

Já, með deginum í dag hefur fólk 14 daga til að senda inn myndir í keppnina. Þetta stefnir allt í harða og skemmtilega keppni. Nú hef ég ákveðið að útvíkka möguleikana á að senda mér myndir, það má enn senda á osg2(hjá)hi.is en auk þess má senda mér á msn, omarsigurvin(hjá)hotmail.com og google talk, omarsg(hjá)gmail.com. Þeir sem eru ekki með mig sem contact geta bara bætt mér við og sent myndina, það er oft þægilegra en að senda tölvupóst. Ekki er heldur skilyrði að fólk sé EITT á myndinni, það mega alveg vera fleiri :)

Að öðru...það eru komnar nýjar myndir úr Gamlárspartýinu og Flórídaferðinni á myndasíðuna mína, tengillinn er hér til hægri undir Áramótamyndir (en svo má líka smella á hvorn tengil hér fyrir sig til að skoða viðeigandi myndasafn í nýjum glugga. Ég mæli sérstaklega með því að skoða partýið, það er einkar skemmtilegt!